Om Plantetunet

Velkomen til....

OPPLYSNINGAR OM OG BAKGRUNNEN FOR PLANTETUNET

Plantetunet er eit urte-og staudegartneri som dei siste 5 åra har helde til i Kinsarvik,som ligg i Ullensvang herad i Hardanger.I Ullensvang er fruktdyrking hovudnæringa,og heradet er m.a.kjent for den vakre fruktbløminga i mai (visitullensvang.no).Gartneriet starta opp i 1993 på eit lite småbruk mellom Kinsarvik og Lofthus.Som nyutdanna gartnar i 1982 budde eg på eit småbruk på vestsida av Sørfjorden i Ullensvang.Første sesongen der fekk eg eit kraftig anfall av pollenallergi.Eit skikkeleg dilemma når eg visste at det var gartnar eg skulle vera! Etter å ha prøvt skulemedisin utan verknad,gjekk eg over til alternativ behandling og vart fri pollenallergien.Under behandlinga møtte eg urtene for første gong,og det var slik det første frøet til økologisk dyrking av mat og urter vart sådd.

UTSALSPLASS MED DEMONSTRASJONSHAGE

Gartneriet har eigen demonstrasjonshage ved sida av utsalsplassen.Hagen er open for alle heile sesongen.På utsalsplassen er der grundige informasjonsskilt ved kvar plantesort,og sidan eg reiser eindel på torg ulike stader,har eg lagt til rette for at kundane kan handla ved sjølvbetjening òg.Dersom kunden ynskjer å treffa meg heime utanom opningstida,kan det vera greitt å ringja på førehand og avtala tid.Etter avtale tek eg òg imot grupper for omvisning/foredrag om nytteplantene i demonstrasjonshagen.I demonstrasjonshagen finst òg nokon reine prydstauder.

Plantetunet har postordresal,og sender planter over heile landet.Eg har ikkje oppkravsgebyr,men sender rekning saman med plantene.Dette har fungert fint.Sjå bestilling for meir informasjon om postordresalet..

OM DRIFTA

Alle plantene er produsert i Plantetunet, -anten av frø,stiklingar eller deling.Dei fleste står i 9x9 cm potter,nokon i runde potter,og nokon få sortar i 11x11 cm el.større.Plantene overvintrar ute i potter.Stort sett klarar dei vinteren godt,men det hender at nokon sortar går ut p.g.a. tøffe vèrforhold.Produksjonen er utan kunstgjødsel og kjemiske plantevernmiddel,og eg reknar den som økologisk.Eg kjøper inn naturtorv,naturgjødsel,sand og kalk,og blandar eiga jord i ein sementblandar.Drifta er den same som då eg hadde Debio-godkjenning.Eg valde etter nokon år å driva utan godkjenning,fordi eg ville bruka tida på plantene i ein travel sesong,-ikkje på ytre råmer.Plantene gjev masse positiv energi, -gjev næring til sjela!
- Kari -